تخبر عننا بين السلاطين

تخبر عننا بين السلاطين||
تخبر عننا أروى وبلقيس.

صنعنا البفك صدرنا كراتين||
وملينا الشوارع بالقراطيس.

وغلفنا البلس باتناك والتين||
وأما الفول نفتحها بدسميس.

وزينا الشوارع بالدكاكين||
وصنفنا البضايع في قواميس.

وسعر الحبه الشمعه ثمانين||
وأما الغاز فاسعاره كوابيس.

وكم عشنا على قازه وبنزين||
ولوما الصين غارت بالفوانيس.

وبعنا النفط وادينا صوالين||
وشيدنا فنادق وسط باريس.

وذي مثلي ومثلك والمساكين||
نسوق اصعب ونرعى للجواميس.

وشرعنا وسنينا قوانين||
وطبقنا على ذي هم محابيس.

وأول شعب دافعنا عن الدين||
وأول شعب سحوقنا طماطيس.

واول شعب يذبح بالسكاكين||
عساكر واكتشفنا إنهم مع ابليس.

وأول شعب شاركنا بحطين||
وقدمنا الجهابذ والقداميس.

وأول شعب في خانة ملاعين||
وأول شعب ذي كله مناحيس.

وأول شعب أحزابه ثلاثين||
دخلنا فيه موسوعات غينيس.

ونتحاكى على لندن وبرلين||
وسلح القمل والقمل على الكيس.

وندخل بالسياسه في الدياوين||
ونتجادل على نوبل ومغنيس.

شويه اعراب نتكلم عن الصين||
رعاة الشاه والخرفان والعيس..