صنعاء اليمن

صنعاء اليمن لا عاش من غدر بش/
أحرق فؤاده من رضي بحربش..

صنعاء اليمن لش عندنا مكانه/
يا خير من لبنان والكنانه..

أعشق عصر ذي كنت فيه أخزن/
واكتب على الجو القصيد واوزن..

واعشق شميله عشق قيس ليلى/
والقات فيها والمقيل يحلا..

واعشق معارضها واموت فيها/
ذي الغواني منها وليها..

واهيم في كمن غزال قناص/
وذكرياتي قي مواقف الباص..

واعشق شوارعها مع الفنادق/
والجو سابر والمزاج رايق..

واعشق مطاعمها وأكلة الباب/
مع البوافي باردات الاكواب..

واجمل حياتي لا دخلت اغدى/
على مرق حالي ولحمة اجداء..

والقات من صبحه معي وبعدا/

اسير اخزن رغم أنف الاعداء..

باب اليمن كله تحف وآثار/
تجار من حمير عقيق واحجار..

فيه الجنابي لافتات الانظار/
والاعسبه مطرزات باشجار..

صنعاء القديمه في الخميس تحلا/
زبيبها حالي وبنها احلا..

جنه عمايرها على مفارج/
حمامها فوق السطوح دارج..

ليلة خميس الهم فيه ممنوع/
والقات حالي والحبيب مشروع..

والماء مبرد والبخور تافح/
والخل بالخل في هواه سابح..

والآنسي والحارثي ونادر/
يا صاحبي هيا معي نسافر..

صوت التراث اجمل على المحاجر/
والقرب مسلم والبعاد كافر..