ياالعاصفه هبي وداوي كل متزمت غبي:

ياالعاصفه هبّي وداوي كُلّ متْزَمِّتْ غبي/
شبّي براكينش وصبّيها حِمَم متلهّبه..
الحُرّيه حزبي وقاموس الرّجُوله مذهبي/
مَنْ عاف قربي له عَلَيَّ العار ما باقاربه..
دام الوفا دربي وانا بالعزّ شامخ كوكبي/
ما هَمَّني قول الصبي واهل الوجيه العايبه..
ان صاحبي جنبي يقِفْ بافديه وابذل واجبي/
وان صاحبي خاين فماهو لي ولاانا صاحبه..
الجيد لا جيته يلبّي في الشدايد مطلبي/
والفسل منّك يختبي وقت الأمور النايبه..
حنّيت من قلبي من ازماني وباطل حَلّ بي/
حنين بي إم بي وكاتيوشا بقوّه ضاربه..
القرش خلَّىٖ اليُبْيُبي يشطح على الصقر الأبي/
والقط قدوه يشتي يرَبّي شبل عاصر شاربه..
والله ما غُلْبي من العادي وفِعْل الأجنبي/
غُلْبي من الصاحب ذي امْسَتْ به ظنوني خايبه..
قَوْله عسل صربي وفِعْله مثل لَدْغ العقربي/
أهوى على حبّي طلع ثعلب لذيله ساحبه..
ما كان في حسْبي حساب ياعين تعلي حاجبي/
ولاالفلوس تسْبي ضماير للرجوله كاسبه..
أقسم بربّي ماانحني واخضع ولااخفِض منكبي/
مهما الزمن صَوْبي سهامه مستحيل اتهايبه..
الفقر هو ذنبي ولكن ذي على العِزه رُبِي/
مُحال يقُل ياعين صُبّي أو يدَنِّي حاجبه..
صامد وصلْبي صخر قاسي صُمّ يادنيا اكتبي/
ظفري ومخلابي على عرش الكرامة واثبه..
الطِّيْب هو ذي حَطّ بي من فوق هامة منصبي/
والطّيْب في شعبي جريمة والعقاب العاقبه..
لاتحترم سِلْبي ولو هو نسْل من آل النبي/
فابو لَهَب أصل القرابه بالنبي ذي حاربه..
ْيانَفْس لاهل الطِّيْب طيبي من صميمش واوْهِبي/
حُبّي لأحبابي فهم عندي فريضة واجبه..
ومَن بغى حربي يجيني يا جَهنّم رَحّبي/
ساح الحرايب ملعبي والنار حمرا غاضبه..
                         ابن فاضل