مساجلات شعرية لعمالقة الشعر الشعبي/الصنبحي والخالدي

بدع الشاعر الكبير/أحمد محمد الصنبحي:-
الصنبحي خاتم سقط لاالبحر ولّى قاعته/
وصاحبه يوم افلته ويش بايعقب بقعته..
مالَه قليل العقل قلي ويش ساقه يفلته/
مايطرحه فوق اصبعه واِلا يرده شنطته..
والبحر موجاته قويه مالقيته شلته/
ولاعاد بايرجع قفا ماقد وصل لا غُبته..
غبون كبدي غبنها ما بايحصل عينته/
من شرقها لاغربها ماقلت له شي يفلته..
لاهو على ايدي وانفلت والله ماانسى وجعته/
ماهَل سخيف العقل فكه وافلته من قامته..
مالا قده خيتم من التقليد بوره سجعته/
يضيع واِلا ينكسر لومه على بياعته..
لا بل لتاجر ماقدر بالسوق يضمن عُملته/
ذي جاب حاجه بايره وبورت في سمعته..
ماالتاجر المضمون ذي كلاً يبا من سلعته/
رخيص لاورد جنى للسوق واغلى قيمته..
واليوم لازم وجه المكتوب لاذي خبرته/
زايد على مفهومنا يرقى الحنش من لقعته..
شايف محمد لا رقى ماتنفع الا رقوته/
هو ذي يحلل كلمتي وانا بحلل كلمته..
ياالخالدي واحد دخل مسجد وضيع قبلته/
ولاعاد صلى الفرض بالمسجدولااقضى سنته..
لكن سخيف العاقل ياشايف تسادا غومته/
وكل ماشاف المرايه ما يرى الاصورته..
مثل المهاجر ذي في المهجر يطول غيبته/
سافر وخلا الرازقي والليم داخل جربته..
من فارق الجنه وسافر من بلاده كيَّته/
ليله مع احبابه ولا مليون داخل بانته..
بايقطف اغصان الخضيره يوم تصبح نابته/
ليله يخذ عنبا وليله ليم يقطع فاقته..
والصنبحي ذي سبني وابطا الوجع لاذمته/
واليوم مااعطاني دواء كبدي ونا في حاجته..
هذا المرض معروف ذي حطه وذي هو سُبته/
ولااعتنى لي بالدواء بايقلعه من بقعته..
حطه ولا يقدر مداوي تفصله سماعته/
مهما نصح واِلا اعتنى مابفصله من خبرته..
ياباطلي قلبي حرق خلاص وقف دقته/
مدري حرق مدري حدا عمرود خذ من آلته..
ليت المهندس يفحصه مجان والا بأجرته/
يتفقد آلاته ويربط كل واير بقعته..
لكن على رب السماء ذي من زقم في عروته/
ما يفلته باينزل العافيه له في ليلته..
هذا وليت الخالدي يسرع علي في اجابته/
مالا تأخر فالوجع ذي صار بي لا ذمته..

جواب الشاعر/شائف محمد الخالدي:-
الخالدي يامرحبا بأبيات من شاعر جته/
بالصنبحي حيا وحيا ماشرح في هرجته..
عرفت ما قاله وما ذاعه بموجز نشرته/
ركز على خاتم سقط للبحر ولى قاعته..
خاتم سقط من يد الاهبل كيف كانه قصته/
هل هوسقط في بحر او جت طامه ذي طمته..
قد ربما خاتم ذهب ملبوس راحت نقشته/
او شاف عين الناس بالخاتم ونفسه ملته..
لو كان فلت له عمد من دون حجه درجته/
لا ترحم الدارج ولا ترثي لجاحد نعمته..
ولا تلوم الفسل ع العيفه وقدها مهرته/
اليوم بالخاتم وبكره بايفلت حزمته..
والتاجر المحتال ذي قصده ينفق حاجته/
لا تشتري منه ولا تعطيه ترِّك عملته..
ما التاجر المضمون ماله ما يهمه نزلته/
ان زاد سعره او نقص ماله ذهب في خزنته.
من واجب الغلطان يااحمد كان يعرف غلطته/
يعز ثوب العز واِلا افضل يرده شنتطه..
والقاضي الكذاب ذي بتقول ضيع قبلته/
ودر صلاته والعباده يوم غير فكرته..
سبق امام الناس واتقدم لها من ساعته/
لا غير قبله قام صلى بالجماعه جمعته..
غر الجماعه بالثياب الطاهره ذي غرته/
صلى بهم من دون لااتوضى ولااخلص نيته..
مالي وله ما باه ما اريده ولا اقبل توبته/
لا انا من انصاره ولا اتباعه ولا من امته..
ولا مهاجر مثل من هاجر وطاله غربته/
واصبح مضيع لا من احبابه ولا من اسرته..
وصاحب الحايط ذي اهمل به وضيع ثروته/
من يحمي الحايط ومن يزرع ويجني خضرته..
يا الصنبحي قل للمهاجر له مصيبه صابته/
ذي ضيع البندق بمعلاقه وضيع زانته..
يهوا على ابوشمس ذي مهجور داخل شقته/
لا بايعه عزه ولا راميه من لباسته..
هذا وعاد السيل من الاشعاب بسمع رجته/
سقيت من فيضه وسقى كل ظامي جربته..
صبري على مابي وصبر الكِبد من مالاقته/
باداوي امراضي وكلاً بايداوي علته..
ياالصنبحي ذي سب كِبدك له سبايب سبته/
لا تحكم اعدامه بسرعه قبل تثبت حجته..
داو المرض بالصبر واِلا خير ترك صحبته/
ازقر مع الجزار واحذر لا تصيبك شفرته..
ما فايده لو قلت باتعطي صديقك رغبته/
قد ربما تحرق بناره قبل توصل جنته..
صديق واثق فيه من قلبي ونفسي حبته/
باافديه في روحي وفوق الراس بااعلي رتبته..
والصاحب الكذاب لااخضع له ولااطلب رحمته/
ما رحمه الا من كريم الجود جلت قدرته..
يقول ابو لوزه درست الفن واعرف مُهنته/
وعطر روح الروح من الاغراش بعرف نفحته..
بااسمر في الظلمه على مصباح لاصي شعلته/
والصنبحي لا الكهرباء طافي يلصي شمعته..

https://www.facebook.com/alsanbhy