إشهريني يا فلوس إشهريني

زينيني يا الفلوس زينيني/

واعملي لي في صدوغي خنافس..

واشهريني يا فلوس اشهريني/

واجعليني ذِكرهم في المجالس..

صاحب الدرهم محله جبيني/

رافع الهامه سما غير ناكس..

شفت بعض الناس قدام عيني/

للغني تربط خيوط المداعس..

وان يسلِّم يا صدور احضنيني/

وان مشى بعده ثلاثين حارس..

يمشي الخط بالطرب والمعيني/

صوت عالي والزجاجات عاكس..

يا حنيني للفقير يا حنيني/

لو قده عيموت قالوا يناعس..

وان عمل غلطه يقولوا  "بعيني"؟ /

وان تكلم صِدق قالوا بعاسس..

الفلوس اليوم روحي وعيني/

و(الطفر) هو قيدنا والمحابس..

ما تعيش في ذا الزمان اللعيني/

غير لا جيبك للاموال كابس!..

العماره والمقيل الحسيني/

والكنب مفروش والقات خالس..

بعدها يا ناس يا قوم جيني/

غيرها ما تستطيع ان تنافس..

وان تكلم يا أذان اسمعيني/

وان تحارب جو معك لا المتارس..

والفلوس ذي تقلب (الروث) تيني/

والفلوس ذي تجعل الراس يابس..

وينما ابغى يا فلوس اطرحيني/

لا تعلمت لا دخلت المدارس..

جهل للتعليم أصبح يهيني/

ريس القوم ما معه صف سادس..