الشوق ماله عمر , يفنى وينعاد
له في الضلوع ان عاد و غاب رجفه
مع كل فرقى, له ورى الجفن ميلاد
وأن ماتت الفرقى لقى الشوق حتفه
جيت أقتل الفرقى من بلاد لــ بلاد
ملّ الطريق يشيلني فوق كتفه
وأنا بعد مليت من كثر ما أرتاد
هالشارع اللي كان لك فيه شرفه
تظمأ عيوني شوفتك , وتشبع سهاد
عيّا الزمن يقطع ظماها بــ رشفه
لاوجهك أسقاها , ولا ذاقت رقاد
ماغير طيفك , طيفك اللي أعرفه
كنّه ظبي , وعيوني ظلال صيـاد
يجفل قبل يرتد للجفن طرفه
مشكلته أنه كل ما أشتقت يزداد
حتى ملا جدران وقتي وسقفه
وأصبحت أشوفه فــ أول الغيم لاجاد
وفــ أقصى الشفق لاطاحت الشمس خلفه
وفـي الأرض لانامت عقب صوت رعاد
وفي كل شباك ٍ صحت منه ودرفه
أتعبت طيفك لوم , واللوم مافاد
ويوم الأمل في شوفتك مات نصفه
نويت أسافر عنك بجروح ٍ جداد
وعمر ٍ من أوراق الزمن حان قطفه
نويت , لكن جابني الشوق منقاد
وجابك حنينك , والزمن سال عطفه
شفتك تبسّم لي خجل مدري عناد
وفي نظرتك شوق ٍ من الظلم وصفه
حسيت كني طفل , وعيونك أعياد
ياعيدي اللي له ورى الصدر رجفه
سمّ اللقا صدفة , وأسمّيه ميعاد
أنا أنتظرتك , وأنت مريت صدفه..
ليست هناك تعليقات:
إرسال تعليق