مساجلات شعرية/بدع الصنبحي جواب ثابت عوض

بدع الشاعر الكبير/أحمد محمد الصنبحي:-
قال الصنبحي بادره اخرى من زعيم اليمن/
باكتبها وباضيفها للقايد بسجل النضال..
اصدر عفو شامل بمن خانو شعبنا والوطن/
والخمسه عفا عنهم اللي قادو الانفصال..
بعد احكام صادر بهم ماهيه بالحقيقه ثمن/
ماقامو به الخاينين بجنوب اليمن والشمال..
عاد اثارهم باقيه في صنعا وبندر عدن/
واعمال الغلط عادها موجوده بروس الجبال..
واحنا والله ان عادنا ياثابت بثوب الحزن/
والنسوان يبكين على ماراحو بها من رجال..
ماحد كان منا يظن ان العفو عنهم وعن/
الماساه بانسمعه كان العفو شبه المحال..
لكن رمزنا الوحدوي يتمتع بخبره وفن/
اصدر عفو شامل بهم قبل المشنقه والحبال..
كم ينضر رصاص البرت والمعشاء وثوب الكفن/
منذي هربونه لهم اثنا حربهم والقتال.
ليلة قسمو ما بقي في الدولار فيما بطن/
والمصدر نشر من عدن للقاتل وضم العيال..
حتى كلهم يرجعو لينا من جميع الغون/
واللي كان في قلوبنا من الاحقاد يذهب وزال..
من اجل ازدهار الوطن بانبني طبن لاطبن/
لنتو مثلنا مخلصين للوحده بمال وحال..
الابواب متفتحه من غرد بصوته وحن/
للوصال من سوريا لاصنعاء يشد الرحال..
اللعبه خلاص انتهت نبدا باحتساب الزمن/
في ضل الهدف الاولي ماالثاني بعيد المنال..
اتصدى للاعيبهم يازارع بذور الفتن/
قل لاصحابكم باليمن ماشي للتلاعب مجال..
صنعاء محميه باهلها من مينا المخاء لاشحن/
والمحضار واليافعي رهن القيد والاعتقال..
وان حلبصته العاصمه بالظاهر وذي مابطن/
بايغلب عليها كما بالبيضا وحَيد الطيال..
كلن يلتزم بالفروض كامل والخطط والسنن/
والا النار قدامكم واهل القتل والاغتيال..
هذا الفصل الاول خرج والثاني دوا للبدن/
فاز الموتمر وانفرد بالسلطه وخذها حلال..
بارك له وهنه معي ياثابت ودندن وغن/
حقق لديمقراطيه مكسب اقتصادي ومال..
الحزب الذي تهتري به حزب الفتن والمحن/
في ربع المسافه قطع ماتقدر معي بالجدال..
باجمال قد قلت لك قد جينا لكم عاالمسن/
لا نزل محمد على بايرفع بديله كمال..
البداع ياهل العرب بايبكي ودمع الوجن/
باتمشي بخده سيول مهما الوقت قصر وطال..
ياللي قصدك انك تجر الدهنه على اهل اللبن/
لو ما اعطيتنى حصتي باكشف سركم والجلال..
قد سالم طلع مستشار للريس ومحسن حسن/
بايصبح محافظ عدن راكز صنجره والميال..
انته والكهالي قضاه حد بأبين وحد في جبن/
والمختار يحيى علي قيم وسط مسجد بلال..
الحداد يطلع وزير وانتم اقتحمتو المهن/
لوما تجزعو بالطرق لا اقلب عاليتها سفال..
كنا ناس متعارفين للبيضا ويافع بخن/
للمركب وعمك علي قسم بالجبل والرمال..
كل القوم تحت امرته من سيحوت لما تبن/
واحور شرق ساحل عدن للحيمه وطرف الطوال.
لا ترقص معا من رقص ما للحيه الا الورن/
انتم سم باكبادنا واحنا سمكم بالطحال..
خذها قاعده ثابته من شفته بضهري طعن/
لا زم تطعنه مثلما طعني بعوج النصال..
لكن با نبارك لكم لانتم تقربو ذي يزن/
محد سيخ في صفكم بارجح بكم الاحتمال..
بارده الى نسبته مهما انكر ولخبط وجن/
تاريخ القبايل معي جد الابن وابنا وخال..
ماهل قلتلك من زمن ما باقول ذاك ابن من/
من طالب بلبس العرب يلبس له مشده وشال..
يتماشا مع العولمه والعملات يورو وين/
والدولا ر ما بصرفه والفارق اثنا عشر ريال..
هذا ما صدر مننا بالمرسوم يا باعشن/
ان شي خل والا بطل لك قيلك وانا لي مقال..
ختمنا بذكر النبي ما يرخي وما المزن شن/
واسقى الارض صلو عليه من ذكره على كل بال..

جواب الشاعر/ثابت عوض اليهري:-
عهد الجاهليه مضى باكبر وشهد علن/
اطلع واعتله الماذنه اذن عاليا يابلال..
الله اولى ان نعبده لا نعبد ونخشى وثن/
ان الله عنده لنا احكام الجزا والوبال..
كلا ايدا بما قدمت سوء اعمالها والحسن/
اجر السيئه مثلها والحسنه بعشرة مثال..
قال المولعي بن عوض غني وافرحي ياعدن/
غيرش راس ماله ذهب وانتي راس مالش رجال.
اتباهي بثوب الفرح والحاسد يشل الكفن/
يتغطى ويلتف به يتوارى ببطن الرمال..
هنيتش وباركت لش عودة سيف بن ذي يزن/
حافظتي على سمعته واتارملتي له عالعيال..
كم كانو لش اتقدمو ما قلبش لمخلوق حن/
دايم مخلصه وافيه حاشاكي من القيل قال..
مفتونه بمحبوبها والمحبوب فيها افتتن/
اجمل ما خلق ربنا مالش بالغواني مثال..
ريحة الاخضرين الشريف ينفح من حمار الوجن/
والوجه المضي طلعته ابهى من طلوع الهلال..
الحساد قلنا لهم موتو قهر موتو حزن/
محبوب المليحه رجع ذي قلتو رجوعه محال..
وا عازم من المملكه من فضلك ثواني تأن/
شل الرد لصنبحي قله بن عوض لايزال..
مثل البحر قدامكم يطويكم على بَن وبَن/
ما تسوو نتيجه معه ما يكسر بديله دخال..
هو ابني وانا والده والوالد على ابنه احن/
وان ابني عصا بالعصا للعاصي ترده عدال..
ابحث عن مصالحتكم وانتو تبحثو عا الفتن/
لا تهدي من احببتهم والله رادهم في ضلال..
قل للصنبحي ما معه يتخبط كما الكركدن/
كلما قامت اترنحت صاحت من لضا الاشتعال..
حاولت اقنعه ما اقتنع لان الحقد فيه اختزن/
يلزمنا سوانا وهو قدام القضا النطق قال..
عاده ما اعترف شي لنا انه في حمانا سكن/
عاد التفرقه راسخه في ذهنه جنوب او شمال..
وحنا عاد في روسنا حب العوبلي من طحن/
له صنعا يخذها وانا  بين العين والنون دال..
لو كلن بقي حيث هو كان احنا براحه وفن/
ما قد كان دينارنا ذي يسوى حدى عشر ريال..
منهم ذي تقل عنهم يابو صقر شله خون/
لاغيرك ولا انته تصل رغم ان ارصدتهم  نضال..
ما عندك بهم معرفه ما هل لك بهم سوء ضن/
سل صنعا وهي تخبرك من ذي سهروها ليال..
بل قلت انهم وانهم خانو شعبنا والوطن/
جابو لليمن كارثه ليلة ما اعلنو انفصال..
والليله تدور لهم يوم اصبحت وسط المحن/
تبغى من يحمل معك تبغى من يسوق الجمال..
ما رجعتهم من دلى لكنه دحن ذي دحن/
ما انته حسب ما يامرك اما روح والا تعال..
عاده ماخلق بالبلد ذي يصدر عل  الميم ون/
يتقدم امام الملا يعدمهم بشارع جمال..
واحذر بعد ما يرجعوا تقتلهم على ون ون/
تقتلهم وقلتو خطا والا بالفرامل عطال..
والمخلص ما بايقع غالي تدفعون الثمن/
والااحسن لكم بطلو لعب الهيبله والغبال..
ذي تسخر بهم اخوتك ذي تشفي غليلك بمن/
هم ذي ينقذونك متى من ذرة عليك الحبال..
لا تتضاهر انك سلي يا حمد وانت كلك شجن/
با تسلا وبا تنبسط في عوده حسين القبال..
لا تخلق لنا مشكله من ماضي مضى وادفن/
واحنا اولاد ذا يومنا نتفاهم على كل حال..
بن صالح محمد رجع غصبا عنكم ياكهن/
ذي كنتم تريدون له بالمنفا يطول المطال..
والقايد صدق ما وعد يتبع له جميع اليمن/
محد له وحد ليس له والطامع زواله زوال..
كلمه فاصله قلتها يحيى العدل يابو حسن/
ما خليت للصنبحي وامثاله فرص او مجال..
واخر فصل باعرفك عن ابن الكهالي وعن/
يحيى حب لك منهم ياحمري شوامخ جبال..
ذا سعدي وذا ناخبي دوله من قديم الزمن/
ذي الجوده وذي المشيخه شلوها لهم بالقوال..
محناشي بحاجه لحد يمنحنا رتب او مهن/
بالنسبه لنا الهيمنه ماهي حلم والا خيال..
https://www.facebook.com/alsanbhy