معذور خلي لا خلف وعده

سلم على من هدني بُعده/

ومن جرح قلبي بغيباته..

والله ما ذقت السلا بَعده/

ولا هني قلبي سويعاته..

معذور خلي لا خلف وعده/

لي زلتي والخل زلاته..

لجله زفرت الهم والنهده/

لجله شربت التبغ وابكاته..

اعشق أبوه وامه واحب جده/

واحب خالاته وعماته..

واعشق خضابه لا نقش جلده/

واعشق سواليفه وضحكاته..

غنيت له من كل ما وده/

عصرت له قلبي بكاساته..

واحلى شرابي ذي تمد يده/

عاني ونا ما قلت له هاته..

ونكهة التفاح في خده/

والتوت معصوره على اشفاته..

هو كليتي والضلع والمعده/

والقلب ذي يخفق بدقاته..

هو سلوتي في ساعت الشده/

هو ذي تسليني حكاياته..

والعود للمجلس وهو نده/

وهو زماني من بداياته..

رد الكبد يا زين لي رده/

واعطف على قلبي وأناته..

حَبك وعاده ما بلغ رشده/

واليوم ناظر لك مجازاته..