حور صنعاء اليمن

في ربى العاصمه ذقنا الهوى والمحبه/

حيث كم من أسيل الخد مكحول الاعيان..

ـــــــــــــــــــــــــــــــــــــ ـــ

سفح صنعاء اليمن حيث الغواني تربه/

عالأصاله وعالحب اليماني والايمان..

ـــــــــــــــــــــــــــــــــــــ ـــ

حور صنعاء اليمن مامثلها حور تشبه/

لا بجده ولا في أرض روما ولبنان..

ـــــــــــــــــــــــــــــــــــــ ـــ

حيث كم من مليحه عادها الساع شبه/

أكلها شهد حالي مايغثيش الاسنان..

ـــــــــــــــــــــــــــــــــــــ ـــ

ظبي شادن غزاله وسط روضه وتبه/

شمها مسك في عنبر وكاذي وريحان..

ـــــــــــــــــــــــــــــــــــــ ـــ

لابدى الوجه في زلة غطاء قلت لمبه/

وان نظرت الكعوب البارزه قلت رمان..

ـــــــــــــــــــــــــــــــــــــ ـــ

وان تفرج على القد السوي قلت حربه/

وان مشت أو تثنى خصرها قلت ثعبان..

ـــــــــــــــــــــــــــــــــــــ ـــ

بنت بلقيس أصل الطعم في كل وجبه/

بنت بلقيس سكر هيل في كل فنجان..

ـــــــــــــــــــــــــــــــــــــ ـــ

ياشهاب اليمن نارك على القلب شبه/

ياسليل الملوك الشم حمير وريدان..

ـــــــــــــــــــــــــــــــــــــ ـــ

ياشقيق القمر كم شمس منك تخبه/

من جمالك،تفسح لك ميادين الاكوان..

ـــــــــــــــــــــــــــــــــــــ ـــ

أذكرك ياالقمـر لاالديك بالصبح نبـه/

واذكرك كلمـا طاير ترنم بالاغصان...

ـــــــــــــــــــــــــــــــــــــ ـــ