هاجسي ملهس العينين بالدمع ملهاس

هاجسي ملهس الخدين بالدمع ملهاس/
وانظم ابيات من بحر الخواطر والاشجان..

آخر العمر ولوا أمرنا شلة اطماس/
وآخرك يا زمن تؤمر على الشيب ورعان..

بعد ذيك الميات الحمر عدوا لنا افلاس/
بعد حمير تولى أمرنا اليوم نعمان..

لابسين المعاوز والبنادق والاسلاس/
خلوا الوضع وسط الشعب غزه ولبنان..

ريوسوا للوراء والخلف بالشعب ريواس/
طيش ورعان ما تعرف سواقه وسكان..

ضيعوا باخره خلف المواني والايباس/
لا قياده بها  ولا كباتن وربان..

عهد عفاش حيا لك على العين والراس/
عهد صالح زعيم الشعب ياخير الازمان..

بو حمد ذي على هولا "تريئست ريئاس"/
لا اشتراكي عيتريئس مثيله ولا اخوان..

زرزر الشعب كله ما سمعنا له انفاس/
مرت العشر والعشرين في أمن وايمان..

زمها من حدود العاصمه لا مكيراس/
لا تبن لا عدن لا ابين ومارب ومران..

كان سيف اليمن كان المهلهل وجساس/
كان ريس ملك حاكم وقاضي وسلطان..

كانت ايامنا في عهده افراح واعراس/
كانت اعياد أما اليوم آهات واحزان..

آح ياحسرتي عالأمن ذي كان بالناس/
ليش يا شعبنا زادت عليك ام صبيان..

كنت تمشي مخف واليوم تمشي تعساس/
بعد ذاك الأمان الخوف في كل انسان..

كل واحد على اخوه اقتلب ذيب فراس/
شعب مثل البقر خرفان من غير رعيان..

واحسبوا من حدعش الفين كم راح من راس/
وابسر الشعب قد نصه حكايس وعرجان..

آح يا شعبنا دسوا لك السم ف الكاس/
يوم ثورة كلاب الحكم دقوا لها الدان..

مكنونا برع مزمار واطبال واطياس/
قادت الحزبيه ذي كلها احقاد واضغان..

ناولونا عنزرع ارضنا لول والماس/
واصبحت كلها يا شعبنا في خبر كان..

بعدما كنت تتغدى سمك دق بسباس/
بعدما كنت تشعل غاز سبر بعيدان..

كنت تشرب جناها شرب واليوم لحواس/
والغلاء في البضايع صار في كل دكان..

يا رجال الوطن يا كل مخلص ونبراس/
يا قياداتنا يا احزاب يا روس واعيان..

وحدوا صفكم والرأي يا كل الاجناس/
وارضخوا للتحاور واعملوا قدر الامكان..

ما من الحرب غير القتل والموت والباس/
والفتن والتناحر والتجاره بالاوطان..

ختمها نسألك ياالله لاابقيت الانجاس/
لك نمد الأكف ياربنا تصلح الشان..

دق الاوغاد واطحنهم من الساس لا الراس/
وانتقم للوطن من كل مغرض وشيطان..

والصلاه تبلغ المختار ما هب نسناس/
او ترنم وغرد طير في روس الاغصان..

خاتم الأنبياء ذي درس الناس دراس/
من كتاب الهدى والكل في ظله اخوان..