راع الشوالي سباني

هات القلم والبياضه واسكب القهوه/
اكتب لك الشعر واقطف من بساتينه.

ما شعر يا صاحب الا ساعة النشوه/
نصيدها قبل ما تهرب شياطينه..

راع الشوالي سباني واستوى موه/
بنقش كفه وصدره ذي به الزينه..

الروح عنده سجينه والفؤاد ايوه/
والقلب أيضا مقيد في زنازينه..

يا ساجنين الحبايب ليش ذا القسوه/
عاد الملك لاسجن يرحم مساجينه..

وابوه ليث الصحاري وامه اللبوه/
وابوك ياريم:"ظبي الكحل في عينه"..

هذا جمالك معك يا فاتني ثروه/
محفوظ وانا شبابي ما دريت اينه..

حافظ عليه الزمن وانا رجع شوه/
والفرق واضح قوي مابين الاثنينه..

له شعر كالليل وانا جمجمه جهوه/
حسدني الوقت واحلقها بسكينه..

يا ليت لي من شبابه لانسي نسوه/
أو يقسم الشعر مابيني ومابينه..

يا شمس بعد المطر في نورها ضوه/
والطل فوق الشجر تلمع مراجينه..

يا صبح يا فجر ألا يا غيث يا صحوه/
يا حقل كل الثمر والورد يكسينه..

يا طير منقوش يا ظبي ابيض الفروه/
يا حوري ابيض أجاد الدهر تزيينه..

غزال مثل القمر من خيرة الصفوه/
في العشر بعد الثمان او قل بعشرينه..

مجسم اغيد جماله بجلب الشهوه/
حوري بجنه عيون الله يرعينه..

الأنف كالسيف بارز ظاهر النخوه/
والدر يا صاح يلمع في أسانينه..

اما عن الوجه يدعي للهوى دعوه/
جمال مسهب وفي وجهه عناوينه..

أما خدوده كمثرى تجلب السلوه/
ومبسمه توت فم البعل يدمينه..

تفاح فواح فوق اغصان في هجوه/
واوذاخ من شعر حول الوجه ظلينه..

أما رموشه على اجفانه بهن سهوه/
مدري من الزهر شفتو مثلهن فينه..

وليل شعره على الساري جلب بلوه!/
لا الظهر والخصر معصوره ثعابينه..

اذا غسلهن وصوبن سالت الرغوه/
يا جسم تشتاق قطر الماء لتصبينه!..

والمشي خطوه جميله بعدها خطوه/
تقول في النجم يدعس لاعلى طينه..

يا ليت من سامره والا لقي لقوه/
او يسمح الوقت لي جنبه بتخزينه..