شفت النساء بالشوارع

وانا على الدرب جازع
شفت النساء بالشوارع
يمشين في كعب رافع
ولبس ضاغط وشفاف

برقع وطرحه خفيفه
والبالطوه القطيفه
تفصول خامه رهيفه
مزرور من كل الاطراف

وطابع الكف نقشه
والشعر مفروش فرشه
وزينة الخد رشه
مكياج من كل الاصناف

تمشي بغنجه ودبكه
والصدر من دون مسكه
بارز ومفكوك فكه
وترعشه هو والاكتاف

والي بتلبس عبايه
تفتح زرار الحمايه
وان جسمها كا المرايه
واضح ومن شاف له شاف

ونسبة اﻻغلبيه
تمشي  وترفع شويه
وافخاذها المستويه
تطلع مع الجنز والهاف

والخصر باقي حكايه
ربطه  بمقصد وغايه
وتعتني به عنايه
من اجل تحريك اﻻرداف

كنه مسلسل درامي
ﻻ قد مشت من امامي
الخوف ينحط عظامي
والجسم يتقطع انصاف

ياناس وضع الغواني
سيء بهذا الزماني
البعض منهن يعاني
يحتاج دكتور واسعاف

كم شفت انا منهن كم
متبرجه دون محرم
والزوج ماظن يعلم
با افعالها والتلهاف

في كل مركز ومعرض
مزحوم نسوان مكتض
مدهف وغاغه ومركض
ﻻ عرف باقي وﻻ اعراف

كل يوم كل يوم تخرج
بالسوق تعرض وتغنج
وعطرها  عطر مزعج
والرمش كا البرق خطاف

تخوض عشرين خوضه
للسوق تلحق عروضه
وتشتري كل موضه
من البدع والتخلاف

حتى بنات المدارس
والفاتنات العوانس
تشتي تخوض التنافس
تفعل كما ريم وانصاف

للكل تظهر  بزينه
تموج مثل السيفينه
ماهو فقط في المدينه
قد شفت منهن بالارياف

والجامعه ياجماعه
اسهل طرق للصياعه
ياكم وكم بنت ضاعه
ودف بها ابليس وداف

المشكله والقضيه
تضحك  مع ذا وذيه
واهل الفتن والاذيه
من هتك الاعراض ماخاف

باقي وباقي مشاكل
عند النساء عام كامل
الانتره  والتواصل
ماجت بعاده وﻻ اسلاف

النت شكل خطوره
دبورهن من دبوره
مكالمه. صوت وصوره
تضيف بالشات من ضاف

واللمس وارد  جلكسي
بالوتس تصبح وتمسي
مع ثلاثين انسي
تشبك خطوط التعراف

باقة مزايا موبايل
وتسهر الليل كامل
وهات لك من رسايل
ومن صور ترسل أضعاف

من فوق عشرين واكثر
قروب ايمو وفيبر
اما على الماي سنجر
تغرف اصحاب غراف

تدخل سكايبي تدردش
وبالتويتر تفرفش
وفوق هذا  تشيش
وتقطف القات قطاف

وكل هذا المصايب
عند النساء والتلاعب
اللوم هو للاقارب
اهل الرقابه والاشراف

الاب ماشاف بنته
واﻻخ ما راقب اخته
ما شي عرف ان صمته
كيف لها الجو كياف

خيره على الناس خيره
كلا يراجع ضميره
هذه بوادر خطيره
ما ترضي الناس الاشراف

يابنت شلي نصيحه
من لسن شاعر فصيحه
ما يفيد بعد الفضيحه
كثر الندم والتأساف

هذا بكل اختصاري
شرحت شرح اضطراري
مع اشد اعتذاري
يوصل لبنت التعفاف

ذي عادها مستقيمه
على الطباع القديمه
لها مكانه وقيمه
وقدرها فاق الاوصاف

لن اﻻصيله اصيله
فيها الصفات الجميله
لو التطور وسيله
تعيش عصر التخلاف

هنا كلامي توصل
والرائي للكل يشمل
والعفو لو هاجسي زل
لي عفوكم اكبر انصاف

حكمتكم تنصفوني
وبالخطأ تنقدوني
برأيكم شرفوني
يامن سمعني ومن شاف

صليت في ختم قولي
على محمد رسووولي
صلاة تغشئ البتولي
ما يمسي السيل جراف